Schoolpraktikantin bi Boelen Werbetechnik in ‘t Gewerbegebiet Neermoor
Moormerland-Neermoor. De 13jahrig Schölerske Helene Badewien van de Freie Christliche Schule Ostfriesland (FCSO) hett bi de Firma Boelen Werbetechnik GmbH in dat Gewerbegebiet Neermoor en Schoolpraktikum maakt. Dat gung over knapp twee Week.
„Upstünds bilden wi twee jung Lüü, de to d‘ School ut sünd, in de Beroop Schiller- un Lichtreklaamhersteller/ske ut, un daarum pass dat good“, seggt Thorsten Boelen, de de Firma 2016 grünnt hett. De 21-jahrig Jule Schönau is al in dat tweede Utbildungsjahr för de Beroop Schiller- un Lichtreklaamherstellske un besöcht de Blockunnerricht in Bremen. „In uns Beroopsschoolklass sünd 14 Lehrwichter un -jungse, un ik arbeid daaran, dat ik de Klassenbest worr“, smüüstert dat Lehrwicht. In dat Praktikum hett se Helene maal wiest, wo dat Bekleven van Fahrtügen geiht – un denn hett se dat sülvst versöcht.
„Dat Bekleven van Fahrtügen funn ik good un dat hett ok klappt. Laterhen will ik maal wat mit Kunst un Gestaltung maken“, seggt Helene Badewien. De Kuntakt na de Bedriev in Neermoor kweem over dat Melkhuuske in Königsmoor, daar is de Moder van Helene Badewien ok fakers.
In ‘t Geheel hett Helene ok in de kört Tied en goden Indruck van de Arbeid in de Bedriev kregen. Se hett dat Setten un dat Gestalten an de PC probeert, de van de Snieplotter sneden Folien utgattert un de för de Montage vörbereidt. Butendeem hett se för sük sülvst en T-Shirt un en Task utfunnen un de bi de Textildruck veredelt.
Dat Foto wurr in de Montagehall bi dat Herstellen van en Lüchtkast för de Firma CD Flurförderfahrzeuge GmbH in Hesel maakt. An de 1,80 x 1,50 m groot Lüchtkast, de mit de neeiste LED-Technik utlücht word, hebben Helene un Jule mitarbeidt. „För Lüchtkasten worden extra Folien nohmen“, seggt Thorsten Boelsen daarto.
Buten Jule Schönau maakt ok Paul Bertram de Utbilden as Schiller- un Lichtreklaamhersteller. He is in dat eerste Jahr van sien Utbilden. Ok Sonja Rohlfs, de al lange Jahren in dat Büro mitarbeidt, un André Spormann, de in de Montage arbeidt, hören mit to de Koppel. Dieser Text entstand in Zusammenarbeit mit der Ostfriesischen Landschaft, Aurich.
Bildunnerschrift:
Van links: De Baas van de Firma Boelen Werbetechnik, Thorsten Boelen, dat Lehrwicht Jule Schönau un de Schoolpraktikantin Helene Badewien
Foto: Inge Meyer
